Es 57. Gabiddel.
Geyyich Abgott-Deenah
1 Di gerechta kumma um,
un nimmand nemd's zu hatz;
gettlichi mennah vadda vekk gnumma,
un nimmand fashtayt's
es di gerechta vekk gnumma sinn
fa si aus di kfoah fumm evila halda.
2 Selli es ufrichtich lawfa,
zayla fridda havva;
si finna roo im dohdes-bett.
3 “Avvah diah, kinnah funn en veibsmensh zaubahrah,
kummet do heah,
diah kinnah funn aybrechah un huahra!
4 Veah sind diah am fashpodda?
Geyyich veah machet diah eiyah maul grohs uf
un shtekket eiyah zung raus?
Sind diah nett kinnah funn ivvah-dreddah,
kinnah funn leeyah?
5 Diah brennet mitt lusht unnich di aycha-baym,
un unnich alli greenah bohm;
diah opfahret eiyah kinnah in di deicha,
un unnich felsa es ivvah-henka.
6 Di abgettah bei di gladda shtay in di deicha
heahra zu diah,
si sinn dei dayl;
zu eena hosht du drink-opfahra ausgleaht,
un shpeis-opfahra gopfaht.
Soll ich dee sacha ohnemma?
7 Du hosht dei bett gmacht ovva uf
en hohchah hivvel;
datt hosht du dei opfahra gmacht.
8 Hinnich di deah un em deah-poshta,
hosht du dei abgott-zaycha kanka.
Du hosht mich falossa, un dei bett abgedekt,
du bisht in's bett un hosht's grohs uf gmacht.
Du hosht en bund gmacht mitt eena,
un gleichsht iahra beddah,
un iahra nakkichheit sayna.
9 Du bisht zumm abgott Molech ganga mitt ayl,
un mitt feel goot-shmakkich ayl.
Du hosht leit mitt dei vatt veit vekk kshikt,
even so veit es es grawb.
10 Du bisht laydich vadda funn awl dei vayya,
avvah du hosht nett ksawt, ‘Ich gebb uf.’
Du hosht yusht noch may grefta kfunna,
un bisht nett meet vadda.
11 Veah hosht du dich kfeicht diveyya,
es du gleekt hosht un mich fagessa hosht,
un aw nett an mich gedenkt hosht?
Voah's nett veil ich so lang shtill voah,
un du hosht mich nimmi kfircht?
12 Ich zayl dei gerechtichkeit un verka abdekka,
un si zayla diah nett helfa.
13 Vann du roofsht fa hilf,
dann loss awl dei abgettah diah helfa!
Da vind zayld si awl fatt drawwa,
en glennah ohften blohst si vekk.
Avvah da mensh es in mich draut,
zayld's land aykna,
un mei heilichah berg eahva.”
Gott Sei Leit Vadda Kayld
14 Un's vatt ksawt:
“Bauwet uf, bauwet uf, rishtet da vayk!
Nemmet alli shtolbah-blakk aus em vayk funn mei leit.”
15 Dess is vass da Hohch un Heilich Gott sawkt—
deah es ayvich laybt un es da nohma “Heilich” hott:
“Ich voon in en hohchah un heilichah blatz,
un aw mitt selli es bekeaht un daymeedich
im geisht sinn,
so es ich da geisht greftich macha kann
funn selli es daymeedich sinn,
un's hatz funn selli es bekeaht sinn.
16 Ich zayl nett immah pshuldicha,
un aw nett immah zannich sei,
veil iahra geisht matt vadda dayt fannich miah,
un aw da ohften im mann es ich gmacht habb.
17 Ich voah zannich veil eah so sindlich un greedich voah,
ich habb een kshtrohft, un mei ksicht fashtekkeld
in meim zann.
Avvah eah hott ohkalda vekk drayya,
un sei ayya hatz nohch gay.
18 Ich habb sei vayya ksenna,
avvah ich zayl een hayla;
ich zayl een fiahra,
un selli drayshta es heila,
19 un preis shaffa uf iahra leftz.
Fridda, fridda, zu selli es veit ab sinn,
un zu selli es nayksht sinn,”
sawkt da Hah, “un ich zayl si hayla.”
20 Avvah di gottlohsa sinn vi da unruich say,
es nett ruich sei kann,
un sei vella bringa drekk un mud ruff.
21 “Es hott kenn fridda,” sawkt mei Gott,
“fa di gottlohsa.”