2
David In Solomon Heng’a Lhahna Thu Asei
1 David lengpa hi a thina ding phat ahung nai phat in aman achapa Solomon chu hiti hin vailhahna ana neijin ahi.
2 “Keima hi leiset chung’a um mihem jouse phat khat leh ache cheh na diu mun chu kajot ding ahitai. Nangman hangsan tah in pasal phatah umchan hin tho in.
3 Pakai na Pathen lungdei lam'in hung chon inlang, alampi hinjui jingin, athupeh leh a dan ho Mose Danthu a kisun bang bangin nit jing jengin, chutileh natohna jouse leh na chena jousea na lolhin ding ahi.
4 Hitia chu nabol leh Pakaijin kei kom'a akitepna jouse chu atohdoh thei ding ahi. Aman ka kom’a eiseipeh chu, 'Nason na chilhah ten alungthim pumpiu leh kitahna neitah a eijui uva ahileh keiman Israel laltouna a khat ka tousah jing ding ahi,' ati.
5 “Chuleh thil dang khat jong aum’e. Zeruiah chapa Joab in ipi anabol am tichu nahen ahi, aman gal lamkai ni, Ner chapa Abner leh Jether chapa Amasa chu ana that in ahi. Aman gal kisat laiya kithat dan a agel vangin hichu chamna umpet a abol joh ahi bouve, akonggah leh akengkoh chu thisan ana matsah in ahi.
6 Hijeh chun ama chung’a hin, phante nati dan dan in hin bolpeh tan, amavang hin lhumsah hih inlang lungmong in alhanmun jotsah hih in.
7 Gileadna um Barzillai chate chung ah khotona hin musah in, anao chu na ankong ah pan lahsah jengin ajeh chu na sopipa Absalom a konna kajam lai nikho chun aman eina khohsah lheh in ahi.
8 “Chuleh Bahurim a konna Benjamin phungmi Gera chapa Shimei chu geldoh in. Mahamaim lam’a kajam laijin ama hin nasatah a eina gaosap ahi. Jordan vadunga eilamtoa ahung chun keiman Pakaiya kihahselna kana neijin na that ponge kana tin ahi.
9 Ahinlah hiche ka kihahselna chun ama them achansah dehpon ahi. Nangma miching nahin chule iloding le thisan naisan pum'a lhanmun ajot ding alampi hin got them peh tan,” ati.
Leng David Thi
10 David chu athitan David khopia chun apu apate toh akivui khom tauvin ahi.
11 David chun kum somli vai ana hom in, Hebron ah kum sagi chuleh Jerusalem ah kum somthum le thum vai ana hom in ahi.
12 Solomon chun leng mun ahin lotan apa David laltouna achun ahung tou tan ahi, chuleh a lenggam chu hoitah in akisuhdet tan ahi.
Adonijah Thi Le Solomon Leng Vaipoh
13 Nikhat hi Haggith kitinu chapa Adonijah chu Solomon nu Bathsheba kimupi din ahungin ahi. Bathsheba in, “Chamna lungpua na hung hinam?” ati.
Ama pan jong, “Ahinai, chamna dia kahung ahi.
14 Tahbeh in keiman na kom'ah thum nom khat kaneije,” ati.
Bathsheba’n jong adonbut in “Ipi ham seijin?” ati.
15 Adonijah in adonbut in, “Nangin na het bangin hiche lenggam hi keija ding dol ahi, Israel mipite hin lengmun lo dinga kei eideiju ahi. Ahinlah thil ahung kilehei jin hiche lenggam hi ka sopipa ahung chang tai, ajeh chu hiche hi Pakai thilgon ahi.
16 Hijeh chun tun keiman na kom’a thil khat bou ka thum nom’e, lungset tah in nei it peh hihbeh in” ati.
“Ipiham seijin?” tin Bathsheba in ana dongin ahi.
17 Aman adonbut in, “Solomon Lengpa kom'ah kei thalheng in thu neihin seipeh in ajeh chu aman na thum-thum chu napeh jeng ding ahi. Shunem nungahnu Abishag khu kaji dingin nei thumpeh in” ati.
18 Bathsheba in aseijin “Aphai, nangma khelin lengpa hengah nahin thumpeh nang’e,” ati.
19 Hiti chun Bathsheba chun Leng Solomon kom'ah Adonijah thil thum chu galhut peh dingin achetan ahi. Lengpa chu anu toh kimuto dingin ahung ding doh tan; anu kom a chun agah kunin jana apen ahi. Ama atouna a atoukit chun anu touna ding chu ahin gonpeh diuvin thu apen ajet lang’a chun atousah tan ahi.
20 Bathsheba in Solomon jah a, “Thumnom thilneo khat kaneijin nei it peh louding kakinem’e,” ati.
Hichun Solomon in, “Ipi ham Henu, seijin ka-itpeh louding nahet chula-em,” ati.
21 “Achutile na sopipa Adonijah dingin Shunem nungah nu khu petan,” ati.
22 “Adonijah dinga iti dan a Abishag chu na thum jeng thei ham? Hiche sang a chu, lenggam jeng jong hi nathum jeng leh iti ham! Ama khu ka’u ahi jong nahe in, chuleh Thempu pa Abiathar leh Zeruiah chapa Joab jong ama langa pang ahi nahei,” ati.
23 Chuin Solomon Lengpa chu Pakai min'in akihahsel in “Adonijah in hiche athil thum hi athipi louleh Pathen'in kei chung'ah akhut lam henlang eithat jeng hen,” ati.
24 Pakaijin kapa David laltouna a eitousah a eisuhdet peh a, akitepna bang’a ei inchen sah a, hiche Pakai chu hingjing jeng ahi bangin, tuni nikho tah a hi Adonijah thi tei-tei ding ahi!” atin ahi.
25 Hiti chun Solomon lengpan Jehoiada chapa Benaiah chu athat din thu apen ahile aman jong Adonijah chu athat tai.
26 Hijou chun lengpan Abiathar Thempu kom'a chun, “Anathoth mun’a na in ah ki nungle tan, nang hi athi dinga lomtah chu nahitai, ahinla tu-tu hin nathat jeng pong’e, ajeh chu nangin kapa David dinga Thaneitah Pakai Thingkhong chu naput peh in chuleh ahahsatna jouse na-na thoh khompi in ahi,” ati.
27 Hiti chun Solomon in Abiathar chu Pakai Thempu panmun a kon'in a haisah in, hiti chun Pakaijin Shiloh a Eli chilhah te chung chang Pakai thu phondoh chu a lolhin sah in ahi.
28 Joab hin Absalom doubolna a chu ana panpi lou vangin Adonijah doubolna joh chu ana panpin ahi. Hitia hi Adonijah thi thu hi ajah phat in Pakai ponbuh munthenga maicham saki teni chu aga tuhtan tan ahi.
29 Hiche hi Solomon Lengpa kom'a ahetsah phat un, aman Jehoiada chapa Benaiah chu athat din asol tan ahi.
30 Benaiah chu Pakai ponbuh munthenga chun achen Joab kom'a chun “Hiche mun a kon chun hungdoh in Leng thupeh ahi!” atin ahi.
Ahinlah Joab in adonbut in, “Hungdoh pong’e hikom'ah thiden tang’e” ati.
Hijeh chun Benaiah chu ahung kilen Joab thusei chu lengpa kom'ah aseipeh tan ahi.
31 “Ama seibang chun boltan” ati. Lengpan, “Maicham munna chun hin thatdoh inlang hin vuitan. Hichun Joab in ajeh beija thisan asona ho chu kei leh kapa insung ah themmona hin sutheng tan te.
32 Ama sanga phajo le chonphajo chuleh kitahjo mini athana phu chu Pakaijin lethuh nante, ajeh chu aman Israel sepai te lamkai Ner chapa Abner leh Judah sepai te lamkai Jether chapa amasa atha chu kapa’n ana hetphah lou ahi.
33 Athisan phu chu Joab leh ason apah ho chungah atonsot in chu jeng hen lang amavang David leh a chilhah chung leh alaltouna chungah atonsot in Pakaijin chamna pejing tahen,” ati.
34 Hichun Jehoiada chapa Benaiah chu achekit in ponbuh theng maicham mun achun Joab chu athat in, chule gammang lam a ainmun'a chun ahin vuitan ahi.
35 Hijou chun lengpan Benaiah chu Joab khel in sepai lamkaijin apansah tan, chuleh Abiathar khel in Zadok chu thempu in apansah tan ahi.
36 Chuin lengpan Shimei chu aga kousah in aseipeh tan ahi, “Jerusalem ahin in kisah inlang cheng tan. Ahinla hiche khopia konna hin mun chom’a potdoh hih in.
37 Nangin Kidron phaicham nahin khokhel pou-pou le hiche nikho ni leh nathi tei-tei ding ahi, chule hiche na thisan phu chu nangma le nangman nakipoh ding ahi,” ati.
38 Shimei in, “Na thutan chu adih e; ken jong kapu lengpan nasei dungjuiya ka chon ding ahitai,” ati. Hiti chun Shimei chu Jerusalem ah phat sottah achengin ahi.
39 Ahin kum thum jouvin asoh teni ajamdoh lhon'in Gath khoa Maacah chapa Achisah kom'ah ajamlut lhon tan ahi, Shimei in aum na lhon ahet doh phat in,
40 sangan chung ah atoudoh in asoh teni hol in Gath ah achen aga holdoh in amu phat in Jerusalem ah ahin puilut kit tai.
41 Solomon chun Shimei in Jerusalem a dalhan apotdoh in Gath aga pha in ahung kile kit tai tin aja tan ahi.
42 Hijeh chun lengpan Shimei chu aga kousah in, “Keiman nangma hi na potdoh louhel ding na potdoh pou-pou leh na thi tei-tei ding ahi tia Pakai minna ka kitep sah nahi lou ham? Hiche a chun nangin jong na thutan chu adih e, 'Nasei dungjuiya ka chon ding ahi' nati hilou ham?
43 Ahileh tua hi nangin ibol’a nangin ka thupeh nit ding’a Pakai minna na kitepna nanit lou ham?” atitan ahi.
44 Lengpan Shemei kom'ah aseiben, “Nangin kapa David chung’a thil gilou tah na-na bol chu na geldoh em? Pakaijin na thilse bol chu na luchung’a chuh sah tahen.
45 Ahinlah keima Leng Solomon in Pakai phatthei boh chu mu jing ingting chuleh David son khat Pakai anga laltouna a hin tou jeng hen” ati.
46 Hichun lengpan thu apeh dungjuijin Jehoiada chapa Benaiah in Shimei chu polang’a apuidoh in athat tai.
Hiti hin lenggam chu Solomon khut noi ah a detchet tan ahi.