3
Solomon In Chihna Athum
1 Solomon in Egypt lengpa Pharaoh toh kinoptona khat anei lhon'in achanu ho lah a khat akichen pi’n ahi. Aman lah leng inpi, Pakai Hou-In asah chai loulai jeh leh Jerusalem kimvel pal akiget chai loulai jeh in ajinu chu David khopia apuilut in achenpi’n ahi.
2 Hiche pet chun Pakai min dopsangna ding’a Hou-In akisah chai loulai jeh in, Israel mipi ten ama-ama mun cheh ah pumgo thilto akisem un ahi.
3 Solomon in Pakai angailun chule apa David thupeh ho jouse chu ajui sohkei jin, chujongleh ama jengin jong pumgo thilto kilhaina ahin gimnamtui halnamna ahin ama deina lai-lai mun ah anabol jin ahi.
4 Hitobang’a Pathen houna mun thupi pen chu Gibeon ahi, hiche ahin achen pumgo thilto 1,000 jenin kilhaina agasem in ahi.
5 Hiche jan chun Pakai chu Solomon kom'ah amangin ana kilah in Pathen'in aseijin ahi, “Ipi na dei ham? Thum'in nape ing kate!” ati.
6 Solomon in adonbut in, “Nangin na sohpa kapa David kitah tah in na ngailun ahi, ajeh chu aman nangma lungtheng tah le thudih tah in, chuleh kitahna neitah in na-na jui jingin ahi. Chuleh nangin alaltouna lo thei ding chapa khat napen kitah tah in na-na ngailu’n ahi.
7 Tun, O Pakai ka Pathen, kapa David khel in leng nei chansah tan ahi, ahinla keima hi imacha helou chapang cha kahi bouvin ahi.
8 Hiti hin keima hi na milhen tum nam lentah le sim joulou mi tamtah te lah a kaum'in ahi.
9 Hijeh chun hitobang nam mite chung’a hi ka vaihom jouna ding leh thil adih leh adihlou ka hetkhen them theina dingin lungthim chihna neipen. Ajeh chu koiham ama changa hiche mipite hijat lah a hi vaihom jou ding ah?” ati.
10 Pakai chu Solomon in chihna athum chu akipapi lheh in ahi.
11 Hijeh chun, Pathen'in adonbut in, “Na gal mite thigam na ding le, haona ding ahilouleh hinkho sotna ding thum louva ka mite chung’a thudih tah a na vaihopna ding’a lungthim chihna na thum jeh in,
12 Keiman nathum chu nape ing katin, hetthem theina lungthim leh koimacha dangin ana nei khahlou khonung jongleh ahin nei khah louding chihna kapeh ding nahi.
13 Chuleh nangin na thum loubeh haona leh minthanna jong kapeh ding nahi! Hitia chu leiset chung’a hi na hinkho lhumkeija leng dang koimacha toh tekahpi thei nahi louding ahi.
14 Chuleh napa David bang’a ka danthu leh ka thupeh ho nanit a najui bukim soh leh hinkho sotna jong kapeh ding nahi,” ati.
15 Hichun Solomon ahung thou in ahileh amang ahi ahin hedoh in ahi. Hichun ama Jerusalem ah akilen Pakai Kitepna Thingkhong masanga chun adingin pumgo thilto ho leh chamna thilto kilhaina asemin chuleh ama ding’a panmun neiho jouse akoukhom in ankong loupitah asemin ahi.
Solomon In Chingthei Tah A Thu Atan
16 Chomkhat jouvin numei kijoh ni lengpa kom'ah aboina thu lhon atanpeh dingin ahung lhon'in ahi.
17 Khat joh nu chun, “Nei lungset in, kapu, hiche nu hitoh inkhat a kachen khom lhon ahin, ama toh inkhat a kaum khom lhon pet in keiman cha khat ka hingin ahi.
18 Nithum jouvin hichenu jong hin cha khat ahingin ahi. Hiche in a hi koimacha dang umlou, keini chang bou kaum lhon ahi.
19 Ahin jan in amanu chun acha chu ana dellih tan ahi.
20 Hijou chun ama janin a thoudoh in keima ka imut pet in ka panga lum ka chapa chu ana kipom doh in, ama cha athisa chu keima anga ana koijin kei cha chu ana kidop doh in aluppi tan ahi.
21 Jingkah langin ka cha chu nao an kavah kigot leh athisa ana hitai! Ahin keiman jingkah lam khovah a kagah vetchil’a ahileh hichu ka chapa anahi tapoi,” ati.
22 Hichun numei khat nu chun ahin pal tan in, “Hiche nangma cha ahin ahing joh chu kei cha ahi,” ati.
Numei amasa nu chun, “Ahipoi, ahing joh chu kei cha ahin, athi chu nang’a joh ahi,” atipeh in, hiti hin Lengpa masanga chun achuti kinel lhon tan ahi.
23 Hichun Lengpan, “Aphai atah chu veu hite, na ni lhon'in naosen ahing joh chu keiya ahi nati lhon'in, athi a chu ama a joh ahi nati lhon’e.
24 Aphai, chemjam hin choi un,” ati. Hichun ama hon chemjam chu Lengpa kom'ah ahin choi tauve.
25 Hichun aman aseitai, “Naosen ahing joh chu bohni souvin lang ani lhon chun hoppeh tauvin!” ati.
26 Hichun, naosen ahing joh anu mong-mong nu chun, Naosen chu a-it behseh in ahung peng jah tai, “Oh Lengpa, chuti ponte that hih in, chapang chu amanu joh petauvin!” ahin titai. Ahin khatnu chun ahin seijin, “Aphai, nangla changlou keila changlou kani lhon'in nei hop peh tauvin!” ati.
27 Hichun Lengpan ahin seijin, “Naosen chu that hih un, ahin ding deinu chu petauvin ama chu anu tah-tah ahi!” ati.
28 Israel mipi ten lengpa thutan chu ajah doh phat un, lengpa chu a kicha tauve, ajeh chu Pathen'in thu dihtah a thutan thei dinga chihna apeh ahi ti amudoh tauvin ahi.