4
Solomon Lenggam'a Vaipo Ho
1 Solomon Lengpa Israel mite ho jouse chunga vai ana hom in ahi,
2 Hiti chun ama ding’a vaihom a pang ho jouse chu hicheng hi ahiuve:
Zadok chapa Azariah chu thempun apangin ahi.
3 Shisha chapa teni Elihoreph leh Ahijah chu lekha sun in apang lhon'in ahi.
Ahilud chapa Jehosaphat chu thusimbu ching in apangin ahi.
4 Jehoiada chapa Benaiah chu sepai te lamkaijin apang in ahi.
Zadok le Abiathar chu Thempun apang lhon'e.
5 Chujongleh Azariah kitipa Nathan chapa chu Gambeh gamvaipo ho jouse chunga vaihom in apang’e.
Nathan themgao chapa Zabud chu lengpa thumop in apang in ahi.
6 Ahishar chu leng inpi thilkeoho vengtup in apangin ahi.
Abda chapa Adoniram chu soh natonga kimang ho vetup in apang in ahi.
7 Solomon in Israel pumpia thunei dingin gambeh vaipo som le ni ana koiyin ahi. Amaho hin leng insung’a neh le chah ho jouse asuhtup jing diu ahi. Amaho khat cheh chun kum khat sung’a lha khat cheh ading amopoh diu ahi.
8 Hiche gamvaipo som le ni ho min chu hiche ho hi ahiuve:
Ephraim thinglhang cheng ho dia, Ben-hur.
9 Makaz, Shaalbim, Beth-shemesh leh Elon-bethhanan ho adia, Bendeker hin apoh ahi.
10 Ben-hased in Arubboth leh Socoh chuleh Hepher gam jong apoh ahi.
11 Ben-abinadab in Naphoth-dor. (Ama hin Solomon chanu khat Taphath kitinu chu akichenpi ahi).
12 Ahilud chapa Baana in Taanach le Magiddo, Jezreel noiya um Zerethan kom'a Bethshan pumpi apon, chuleh Bethshan apat Abel-meholah kikah gam pumpi Jokmeam chung lang jong apon ahi.
13 Ben-geber in Ramoth-gilead le Gilead na Jair khopi ho pum in apon (Jair kiti hi Manasseh phung ahi), chuleh Bashan a Argob gamkol jong apon, chuleh sum eng kelkot kiget khum leh kulpi kikai khum khopi lentah cheh somgup jong apohtha’n ahi.
14 Iddo chapa Ahinadab in Mahanaim apon ahi.
15 Ahimaaz in Naphtali apon (Ama hin Solomon chanu lah a khat Basemath chu akichen pin ahi).
16 Hushai chapa Banna in Asher leh Aloth apon ahi.
17 Paruah chapa Jehoshaphat in Issachar apon ahi.
18 Ela chapa Shimei in Benjamin apon ahi.
19 Uri chapa Geber in Gilead gam leh Amor mite leng Sihon gam leh Bashan leng Og gam jong ahop ahi.
Judah gam pumpia gam vaipo khat jong ana koiyin ahi.
Solomon Phattheina Le Chihna
20 Judah leh Israel te hi twikhanglen pang’a neldi jat apha jengun ahi. Amaho hi neh le chah ijakai jong anengchet jengun ahi.
21 Solomon hin sahlang gam Euphrates vadung apat lenggam jouse ahin, lhanglam gamkai Egypt gamgichin a konna Philistine te gam gei aboncha chunga hi alengvai apoh ahi. Gam kilokhum mite a konin Solomon jabolnan sum athot un ahinkho sungin ajen jingun ahi.
22 Solomon Leng inpi’a nikhat neh le chah ding chu changbong neldisel atena 150 leh aneh a tena 300,
23 chuleh bongchal thao cheh 10, hamhing lah a kivah thao chet bong 20 leh kelngoi 100, hicheng lah a hi sakhi chal ho leh sangan ho jong ki simtha loulai chuleh sakhigol ho leh ahchal thaotah ho jong kisimtha lou ahi.
24 Ajeh chu Solomon hin Eupharates lhumlam gamsung, Tiphsah apat Gaza geija vaipoh thaneina anei ahi. Chule akigamgitpi jouse chutoh chamnan akhosa uve.
25 Solomon damlai sungin Judah le Israel sung pumpi sung’a hin chamna leh bitna ana um'in ahi. Chuleh sahlanga Dan gam apat lhanglam Sheba geijin min ama-ama in le lou mongtah in ana neijun ahi.
26 Solomon'in a kangtalai ho koina ding 4,000 jen aneijin chuleh sakol jong 12,000 aneiye.
27 Gambeh vaipo hon kitah tah le lolhing tah in Solomon Lengpa le leng inpia anneh twidon avat umlou hellin, aneh jing theina diuvin ama-ama kingensena dungjui cheh in atong doh jingun ahi.
28 Hiche chungchon ahin ama hon sakol chang leh changpol jong sakol ho neh dingin ah akoi neng jingun ahi.
29 Pathen'in Solomon chu chihna le hetthem theina twikhanglen pang’a neldi jat apen ahi.
30 Tahbeh in achihna hin solam gamkaija miching ho jouse leh Egypt gamsung’a miching jouse akhokhel in ahi.
31 Ama chihna hin midang jouse akhel in Ezrah mi Ethan sang'in jong aching jon, Mahol chapa te Heman le Calcol chule Darda ho sang'in jong gamchengin aching jon ahi. Aminthan na hin avel’a mite ho jouse a khokhel in ahi.
32 Aman thuchih 3,000 leh la 1,005 ana sem in ahi.
33 Aman thingphung ho thudol, Lebanon gam a Cedar thingho, pal khekeh kah chung dunga kehthei hyssop hamhing neoho chan geijin jong ana seitheije. Aman gamsaho thudol, vachate thudol ahin, a-op a kithol tho ho thudol ahin chule nga ho thudol jengin jong ana sei sohkeijin ahi.
34 Leiset chunga lengho jousen athusei aja uvin chuleh athusei ngai dingin palai ho asol uvin ahi.