48
Pakai Hi Aloupi Tangeiye Chule Loupi Tah A Vahchoi Ding Ahi.
Korah Chapa Te Labol.
1 Pakai hi iti loupia hitam,
ichan gei a pachat dinga lom hitam,
I-Pathen'u chu akhopia acheng'in,
amol theng'a atouvin ahi!
2 Hiche hi asang'in ahoi lamdang'e;
leiset pumpi'n mu ding atup un athanom cheh ui!
Zion mol, moltheng,
chu Leng thupipa chenna khopi ahi!
3 Pathen ama tah chu Jerusalem indan sung'a chun acheng'in ahi,
Ama tah hi avengbit a pang ahi akilang doh e.
4 Vannoi mite lengho akigom'un
hiche khopi dounan ahin nokhum'un ahi.
5 Ahinla ama hon amuchet phat un, atangchot jeng'un;
atijauvin ajammang gam tauve.
6 Amaho chu tijat nan numei naonei hon
hahsatna ato bangun akithingleu jeng'un ahi.
7 Ahin nang'in Tarshish te kong thupitah ho
solam huijin asuhset bangin nasuse tan ahi.
8 Keihon hiche khopi loupina chu kana jauvin,
tunvang Pathen hatchungnung khopi chu—
keiho tah in ka muchen tauvin ahi.
Hiche hi I-Pathen'u khopi ahi;
Aman tonsot a ahoidoh ding ahi.
9 O Pathen, na Hou-Intheng sunga nangma ka vahchoi lai un
na mingailutna longlou chu kagel jingui.
10 O Pathen, namin ja dia kilom tah ahi bangin,
leiset kolmong geija vahchoiya naum ding ahi.
Najet lam ban thahat chu galjona a dimset ahi.
11 Zion mol'a mipi ho kipah uhen.
Judah khopiho
na thutan dih jeh hin kipah uhen.
12 Cheuvin, Zion khopi gakholchen'un.
Akimvel'a kijot uvin a insang ho jong gasim'un.
13 Akhopi jouse jong gachon uvin lang,
akulpi bang nasa tah ho jong melchih un,
chule nang hon nason nachilhah teu,
naseipeh thei diu ahi.
14 Ajeh chu Ama hi hitobang mong Pathen ahi.
Ama hi tonsot-tonsot geija dinga,
I-Pathen'u ahin Aman ithi tokah uva eipui hoi diu ahi.