57
Suhgim'a Aum Laiya Huhdohna Dia Pathen Henga David Atao.
Saul a kon'a ajammang'a songko a akisel laiya “Sumang Hih In!” lakaiya sah dia David labol.
1 Nei lungset in, O Pathen, nei khoton!
Nei venbit jingna dingin nang malam kahin sang'e.
Hahsatna ho abeitokahsea
na lhaving lim noiya kakisel jing ding ahi.
2 Ka chung'a athilgon eisuh bulhing pehna dingin,
Pathen Hatchungnung Pen chu ka kouve.
3 Aman eihuhdoh ding chuleh eidel le-le ho jumsahna dinga,
van'a kon'a panpina eihin peh ding ahi.
Selah
ka Pathen'in angailutna longlou leh akitahna a chu eihung vil ding ahi.
4 Keipi bahkai hangtah hon mihem te a anchah dia
achanlhih le bangin gal miten eiumkimvel uvin—
aha uhin tengcha leh thalchang bangin asunvang theijin,
aleiyun jong chemjam hemjet tobangin asattan thei uve.
5 O Pathen, nangma hi van mun jouse chungvum sang'in hung kichoisang'in!
Na loupina hin leiset chung mun jouse hi salvah hen!
6 Kagal miten thang eikampeh uve.
Keima lunggim leh lung lengvai in kaum'e.
Ama hon ka lampia kotong thuh tah alaiyun,
ahinlah amaho ma alhalut jiuvin ahi.
Selah
7 O Pathen, nanga lungmonna kanei e;
nanga kalung among e.
Nangma thangvah la kasah thei hi thil kidang ahipoi!
8 Thou in, kalung!
Thou in, o Semjang le tumging!
Ka vahchoi la'n khovah hi thoudoh ing e.
9 Pakai, mipi ho jouse lah a, na thangvah ing'e.
Namtin vaipi jouse lah a nangma na thangvah ing kate.
10 Ajeh chu na mingailutna longlou hi vanho bangin asang e.
Na kitahna in meilom lah apha'n ahi.
11 Kichoi sang'in, O Pathen, van mun sangpen ho sang'in.
Na loupina in leiset chung pumpi hi salvah hen.