58
Migiloute Chungthu Tanna Dia David Taona.
La Lamkaipa henga “Sumang Hih In!” lakaiya sah dia David labol.
1 Thutah— nangho vaihom hon ipi kiseina ahi nahet u hinam?
Nang hon thu adih a natan'u hinam?
2 Ahipoi! Nang hon nalung sungun thudihlou na gong'ui.
Gamsung'a hunam'a natohna ngen na chelheh sah un ahi.
3 Miphalou ho hi chonsesa peng'a ahiuvin;
ahung pen uva pat in jou apan'un ama deidan cheh in achon'un ahi.
4 Ama hon gul bangin gu hattah alhauvin;
gulsoh bangin thuhil angainom pouvin,
5 gul lamsah hon a theileu ichan geija amut ngaisel vangun,
akihetmo sah un ahi.
6 O Pathen, aha uhi subong jengin!
O Pakai, hiche keipi bahkai ho hi ahau suhgoi peh jengin!
7 Tolgoa twi isunlhah a agotloiji bangin mangthah loi jeng uhen.
Akhut uva achoi u agal manchah u chu manmo sosah jengin.
8 Dahdeng amacham'a ajunlhahji bangin junlhah sah in,
naosen athisa hung peng nisa mumanlou bah sah in.
9 Hampa kisatlha bangin ateh akhang Pathen'in lhamlha jeng uhen,
leibel meikou lah a ling le khao kigouvam sangin gangjo jeng uhen.
10 Thil dihlou ho akilethuh teng mi chonpha ho kipah diu ahi.
Mingol ho thisan'a amahon akengphang'u akisop diu ahi.
11 Chuteng achaina le mijousen asei diu,
“Pathen adia hing ho dih theina chu kipa thilpeh ahin;
leiset a jong thudih a thutan Pathen aum mong'e.”