59
Galmitea Kon Huhdohna Dinga David Taona.
Saul in David thana dia a inn a asepai ho asolna chunga “Sumang Hih In!” lakaiya sah dia David labol.
1 O Pathen, kagal mite a kon'in nei huhdoh in.
Keima eisumang dinga hungho a kon'in nei huhdoh in.
2 Mi sugenthei ho a kon'in nei huhdoh inlang;
tolthat ho a kon'in nei huhdoh in.
3 Ama hon eichang lhiuve.
Pakai, melma engsetah te hon eingah un,
keiman amaho dounan imacha thilse kabol poi.
4 Keiman imacha thilse kabol pon,
hinla keima eidelkhum dingin akigo jing'un ahi.
Hung thoudoh in thilsoh ho hi hung ven lang nei kithopin!
5 O Pakai, Pathen hatchungnung, Israel te Pathen,
ei hung thoudoh inlang mi phalou namtin vaipiho hi gimbolna hung petan.
Kitahna neilou miphalou te chung'a hin khotona nei hihbeh in.
Selah
6 Amaho jan tengleh ahungdoh jiuvin,
uingol hon mi angih bangin
lamlen'a akijot un apeng le jiuvin ahi.
7 Akamsung uva thu thanghoi hung potdoh khu ngai in;
chemjam a kisat bang'a ngai thada umtah ahi.
“Hitobang'a, ngai thaset umtah hi kon angai ngam ding ham?”
8 Ahinla Pakai, nang'in amaho chu na nuisat e.
Miphalou namtin vaipiho chu na hohdal'in ahi.
9 Nang hi kahatna nahi; eihuhdoh din nang kangah jing e,
ajeh chu nang hi ka kivenbitna kulpi nahi.
10 Ka Pathen'in, ami ngailutna longlouva chu eidinpi ding ahi.
Aman ka melmate jouse chung'a agaljona a eimusah ding ahi.
11 Amaho chu that hih in, ajoleh ka miten kihilna a aman uhi sumil loi get unte;
eipanpi O Pakai, amaho khu thethang inlang akhupboh uvin dilsuh sah jeng tan.
12 Akam uva chonset thu ngen aseidoh jeh uleh,
alei uva thilse ngen aseidoh jeh un,
akiletsah nau, ahanset nau chuleh ajousei nauvin
manchah jeng uhen.
13 Na lunghan nan amaho chu sumang'in!
Abonchauvin sumang jengin!
Chutengleh vannoi leiset pumpin Israel chung'a
vaihom Pathen nahi chu ahet diu ahi.
Selah
14 Ka melmate jan leh hungdoh un tin,
uicha ngol hon mi angih bangin
lampi dung'a akisen le leuvin ahi.
15 Amaho neh ding an holnan avahle leuvin
ahin oivana kham amulou jeh un gilkel pum'in alum jiuvin ahi.
16 Hinla keiman vang, na thaneina chu vahchoi la'n sang'e.
Na mingailutna longlou chu jingkha seh leh kipah tah in vahchoi la'n sang'e.
Ajeh chu nangma ka kulpi,
ka hahsat tengleh ka kiselna nahi.
17 O kahatna Pakai, nangma thangvah nan lan sang'e,
O Pathen, nangma ka kiselna nahin,
na mingailutna longlou chu nei musah jing'e.