60
Israel Huhdoh A Aumna Dia David Taona.
David in Aram-naharaim le Aram-zobah akisatpi a Jaob ahung kile a Chiputna Phaicham a Edom mite mi 12,000 atha jouva “Hetchetna Lily” lakaiya sah dia David labol.
1 O Pathen nang'in keiho hi neipaidoh tauvin ka kiselna'u jouse jong neisuh chimpeh tauve, nangma keiho chung'a analunghang jongleh chun na lungsetna neimusah tauvin.
2 Ka gamsung'u na hotling in chuleh na pokehsah ji'n ahi.
Tun vang akehlai mehbit tan, ajeh chu gam leiset akithing'in ahi.
3 Keiho hasatna tah nahin pen,
jukham a lon le-le ho nei sodoh jeng uve.
4 Ahinla nang'in nangma ginna neiho dingin ponlap khat neina dopsang peh un—
hichu min eihin nokhum teng uleh eikigop khom sah in ana pang'e.
Selah
5 Tun na ngailut na mite hi huhdoh tan.
Ka taona ngaijin lang naban thahat in nei huhdoh tauvin.
6 Athenna in Pathen'in:
“Keiman Shechem hi kipana a kakehso ding ahi.
Succoth phaicham hi ka mite ka hoppeh ding ahi.
7 Gilead hi keija ahin,
chuleh Manasseh, jong ahi.
Ephraim, ka thih lukhuh, hin gal hat miho ahin sepdoh ding,
chue Judah, ka leng tenggol, hin leng tamtah ahin sepdoh ding ahi.
8 Ahin Moab, vang hi ka kisilna kong ahin, ka sohna ahin toh ding,
chuleh Edom a hi ka kengto kathehngim ding
chutengleh Philistia chunga ka galjona kahin sapdoh ding ahi.”
9 Koi penin kul kiget khum khopia hi eipuilut ding ham?
Koi penin Edom chung'a hi galjona eihin pohlut peh ding ham?
10 O Pathen, nang'in nei paidoh u hitam?
Nang'in ka sepai te toh galsatna a neihung lhonpi louding hitam?
11 Oh, lungset tah in ka galmi teuva kon'in nei panpin,
ajeh chu mihem panpina hi aphachom aumpoi.
12 Pathen panpina jal'a hi thil loupi tah-tah tohdoh a um ding ahi,
ajeh chu Aman imelma teu achotpha ding ahi.