67
La lamkaipa heng'a Pathen Choian Dia Mihemte Tilkhouna.
1 Pathen lungset them hihen lang phatthei eiboh uhen.
Amaivah chun eisalvah uhen.
2 Leiset pumpi a nadei lam kilang hen,
muntin'a mihem ten na mihuhhingna thahat chu heuhen!
3 O Pathen namtin vaipin na thangvah uhen.
Henge, namtin vaipin na thangvah uhen.
4 Vannoi leiset pumpin nangma thangvah la sauhen,
ajeh chu namtin vaipi chunga hi thudih a vaihom nahin
vannoi leiset pumpi hi na puihoile jinge.
5 Namtin vaipin na thangvah uhen, O Pathen.
Henge, namtin vaipin na thangvah uhen!
6 Hiteng chuleh leiset in chang le mim gaso sah intin,
chuleh Pathen, I-Pathen uvin nengchet a phatthei eiboh diu ahi.
7 Henge, Pathen'in phatthei eiboh un tin,
chule vannoi leiset mihem te jousen Ama chu agin diu ahi.