68
David In Bitna Le Thil Jouse Pepa Pathen Jana Apeh.
La Lamkaipa heng David labol.
1 O Pathen, hung kipat inlang, na melmate hi thethang jengin.
Pathen doumah bolte jouse akihuhdohna diuvin jam uhen.
2 Amaho khu meikhu bangin mut mangin.
Meisa lah a khoilu ajollhah bangin jollhah sah in.
Pathen ansung a kon'in migilou te mangthah jeng uhen.
3 Hinlah mipha ho chu kipah uhen.
Amaho chu Pathen angsung'ah kipah uhen.
Kipa thanop nan dimset uhen.
4 Pathen le amin thangvah la sauvin!
Meibang lom puile pa thangvah la choh thet in sauvin.
Amin chu Pakai—
kiti ahi a angsunga kipah un!
5 Pa neilou te dia Pa nahin, meithaiho hoidam jing nahi—
hiche hi Pathen ahin, aumna chu muntheng ahi.
6 Pathen'in changkhatpu hinkho chu insungmi lhingtah in akoijin;
songkul a tangho chamlhatna apen akipa sah tai.
Ahinlah thua nunglou ho chu nisan akah gepna neldi gam'a achen sah e.
7 O Pathen, na mite Egypt gam'a kon'a nahin puidoh a chun,
gamgo lah a nahin pui galkai chun,
Selah
8 Israel Pathen, Sinai Pathen
nangma masang'ah leiset akithing in,
van hon go ahin juhlhah sah in ahi.
9 O Pathen, nangman leigo chapnou sah din
go nengchet in neihin peuvin ahi.
10 Akhon nan hichea chun na mite na chensah in,
neh le chah nengchet in napen,
na mite ngaichat jouse jong nape tai.
11 Pakaijin thucheng khat asei leh,
mi tamtah in hiche kipana thu chu apoleuvin ahi.
12 Melma te lengho le asepai te ajam gam tauvin,
Israel numei ten athilkeo u achom gam peh tauve.
13 Kelngoi hong'a chengho jengin jong nei le gou tamtah—
alhaving teni dangka le amul sana a kisem
vapal akimu uve.
14 Hatchungnung chun Zalmon Mol chung'a buhbang kithejal bangin
melma lengho chu athejal gamtan ahi.
15 Bashan a mol ho hi athupi thei lheh jeng uve,
mol monghem tamtah vanthamjol a akilhungdoh jenge.
16 O molsang gumtahho, ibol'a thangthip tah a navet uham,
Zion Molsang Pathen'in alhenna mun,
tonsot a achenna ding chu?
17 Sakol kangtalai simjoulou hon akolkhum,
Sinai Mol'a kon'a hung'a amuntheng a lut ding ahi.
18 Nangma achung sanga na kaltou tengleh,
gal hing'a kiman tamtah na puitou ding ahi.
mipi ho a kon'a kipaman tamtah nasan ding,
nangma na douho a kon'a jong nasan ding ahi.
Hiche a chu Pakai eiho lah a cheng ding ahi.
19 Pakai chu thangvah in umhen; eihuhhing pau Pathen chu thangvah in umhen!
Niseh a aman abanjang a eikai u ahi.
Selah
20 Eiho Pathen hi mihuhhing Pathen ahi!
Pakai leng chungnung hin thina a kon a eihuhdoh u ahi.
21 Pathen'in amelma te luchangho asuhchip ding ahi,
thilse jeng bolna a kipeho chu alugu u asuhchip ding ahi.
22 Pakaijin aseiye, “Bashan a kon'a ka melma te kahin pui lhah ding ahi;
twikhanglen lailung a kon'a kahin puidoh ding ahi.
23 Ka mite, nang hon, athisan uva chu na kengu na kisop theng diu,
chuleh na uicha hou jengin jong chan anei diu ahi!”
24 O Pathen, na hung kijot u chu muthei in ahung kilangdoh tai—
ka Pathen le ka lengpa muntheng a na kijotlut u chu.
25 Lasaho amasanga aumun, tumging saiho anunga aum'ui;
alailunga chun nungah hon vohging thei ho avouve.
26 Israel mipite Pathen thangvah un;
Israel hinkho hung kondohna ho, Pakai chu thangvah un.
27 Ven phung neocha Benjamin'in ahin lamkaiye.
Aban'ah Judah a kon a vaihomho,
chule Zebulun le Naphtali a kon'in vaihom tamtah ahung uve.
28 O Pathen, naban thahat chu jedoh in.
Achesa nikho ho bang chun, naban thahatna hung kilangdoh hen.
29 Jerusalem a na Hou-Intheng ah leiset lenghon
nahung lutnau thil ho ahin choi uve.
30 Na melma namtin vaipiho—
pang lah a kisel gamsaho,
ahatmo bongnou ho lah a bongchal ho hi phohsal in.
Kisunem tah a ahunglut nau thil in sum lhon ho hinchoi sah in.
Galbol'a thanom namtin vaipiho thethang in.
31 Egypt a kon'in kipa thilpeh dingin thil mantam ho hinchoi uhen;
Ethiopia mite Pathen a akipehlutna uvin bohkhup uhen.
32 Leiset lenggam hon, Pathen la sauvin.
Pakai vahchoi nan sauvin.
Selah
33 Vanlaijol'a kon'a ogin hattah hung kithongdoh a,
masanglai vanho lah a kitolle pa vahchoi nan la sauvin.
34 Pathen thuneina hi mijouse hetsah un.
Aloupina chun Israel te ahin salvah in;
athahatna hi vanho chung'ah akilang jing'e.
35 Pathen hi amun theng'ah gimnei tah in aum jing'e.
Israel Pathen'in amite chu thuneina le thahatna ape'n ahi.
Pathen chu thangvah in umhen!