69
Gam Mitea Kon Kihuhdoh Ding David In Angaichat.
La Lamkaipa henga “Lily ho” lakaiya sah dia David labol.
1 Eihuhdoh in, O Pathen,
twisoh hin ka ngong gei achup tai.
2 Bonlhoh lah a hin ka lhalut cheh-cheh tai;
pansatna ding ka mujou tapoi.
Keima twithuh lah a ka lhalut tan,
twisoh hin eichup tai.
3 Panpi ngaiya ka kanan katha achollha tai;
kalol homsung jong agolha tai.
Ka-ka kanan kamit jong apomtan,
Pathen'in eipanpi ding kangah e.
4 Ajeh beihel'a eivetda ho hi
ka lujanga ka samjang sang'in atamjo uve.
Ka melmate hin jouthu jenga suhmang ding eigouvin,
hiti hin kaguh louhel thil chu ka nungpeh din athum uve.
5 O Pathen, ichan geiya ngol kahi nahe nai;
ka chonsetna ho hi nang'a kon'in akiselmang theipoi.
6 Keijeh in nangma tahsan ho chu jumsah hihbeh in,
O Van Sepaite Pakai Thaneipen.
Kei jeh in nangma hou mite hi kisuh jumna nei hisah hihbeh in,
O Israel Pathen.
7 Ajeh chu nangma jal a housetna ka thoh ahi;
jumna le jachatna kamaiya adimset tai.
8 Ka sopiho tah jengin jong eikihetmo sah tauvin;
gamchom mi bangin eibol tauvin ahi.
9 Na Hou-In a dinga ka tompan jeh in eichai deh tan ahi,
nangman na houset nau jouse chu ka chunga achutan ahi.
10 Kap pum'a an kangol a chun,
noise tah in eihou un ahi.
11 Ka genthei phondohna a khaodip pon ka kisil'a ahileh,
einuisat un ahi.
12 Keima hi khopi sunga jalhang a kihoulim nopna bep kahi tan,
jukham hon kei chung chang thu totnop nan anei tauve.
13 Hinla Pakai na henga katao jingin,
tuchung beh neihin khoto ding kakinem e.
O Pathen, na mingailut longlou chun ka taona hi
huhhingna tahbeh a chun nei donbut in.
14 Bonlhoh lah a kon hin nei huhdoh in;
athuh jep a nei lhahlut sah hihbeh in,
eivetda ho lah a kon'in nei huhdoh inlang,
hiche twithuh lah a kon hin nei kaidoh in.
15 Twisoh hatlai nei chupsah hih in,
ahilouleh twithuh gillai jong nei vallhum sah hih in,
ahilouleh thina lhan kotong jong nei nehmang sah hih in.
16 O Pakai, ka taona nei ngaipeh in,
ajeh chu na mingailutna longlou hi kidang tah ahi.
Nei kaihoi jingin,
ajeh chu na mikhotona hi lolhing tah ahi.
17 Na sohpa a kon hin kisel mang hih in;
gangtah in nei donbut in, ajeh chu keiman boina nasatah katoh tai!
18 Hung'in lang neihung lhatdoh tan;
ka melma te a kon'in neilha ong tan.
19 Nang'in ei kijachat sahna, housetna, kijumbolna ho jouse na hesoh keijin ahi.
Ka melma ten abol jouseu nahesoh keiye.
20 Ami taitom nauvin ka lungthim asukeh in,
kadai lheh jeng tai.
Mikhat seh hijongleh lungsetna eimusah umhen lang;
khattou hung kihei henlang eihin lungmon sah le kanom e.
21 Ahinla chuti malah in ama hon kaneh din gu eipeuvin;
ama hon kadon dingin juthuh eipeuve.
22 Amasang uva neh le chah dimset dokhang chu akipal nau soh henlang
ahao nau chu amaho dingin thangkol hisah jeng tan.
23 Kho amuthei louna diuvin amit u chojeng henlang,
atahsau kithing thingin umsah jengin.
24 Nalung hanna chu achung uvah sunglha jengin;
nalung hanna meikong achun amaho chu kavam jengin.
25 A-in'u chu ahomkeo sohdoh jeng henlang
aponbuh u jong kihoh doh jeng hen.
26 Gotna napeh mi chun, akisuhkhahna chung uva jumbolna akoibe uve;
akisukha ho chu natna abelap peh uve.
27 Achonset nau setvum peh unlang,
khatcha ongthol'in lha hihbeh in.
28 Amin u chu hinna lekhabu a kon'in thaimang peh in;
michonpha ho lah a kisimtha sah hihbeh un.
29 Keima natna thohgim in kaum e.
O Pathen, na mihuhhingna thahat chun nei huhdoh in.
30 Hiteng chuleh keiman namin pachatna la'n sangting,
chule thangvahna pum'a jana kapeh ding ahi.
31 Ajeh chu hichun kilhaina bongchal kitohdoh sang'a Pakai chu alunglhai sah ding,
bongchal akeng tin ho le aki teni geiya kipe sang'in jong alunglhai sah joi.
32 Mi kineosah ten a Pathen'u natoh mu uvintin kipah diu ahi.
Apanpi dia Pathen holte jousen kitilkhouna nei cheh uhen.
33 Ajeh chu Pakaijin ngaicha geova umte taona angaijin;
Aman sohchang'a umho don louvin akoi jipoi.
34 O van le leijin Pathen vahchoi uhenlang,
twikhanglen le asunga cheng jousen jong vahchoi uhen.
35 Ajeh chu Pathen'in Jerusalem ahuhdoh ding
Judah khopi ho asemphat ding ahi.
Hiche a chun amite chengun tin
gamsung chu alo diu ahi.
36 Ama thu nit jing chaten gamsung chu louvin tin,
chule ama ngailu ho jouse hiche mun a chu lungmonga cheng diu ahi.