71
Tehsepu Taona.
1 O Pakai, eihuhdoh ding ngaichan na kom kahinbel e;
nei lunglhah sah hih in.
2 Nei huhhing inlang nei huhdoh in,
ajeh chu nangma adih nahi.
Nakol hin sung'in lang kasei nei ngaipeh in,
chule nei chamlhat sah in.
3 Ka kisel jing theina din
ka hoidamna songpi hijingin.
Keima huhhing ka chan theina dingin thupeh chu pen,
nangma ka songpi le ka kiselna nahi.
4 Ka Pathen, miphalou ho thaneina a kon'in nei huhdoh in,
eibolse a mi engbolse ho a kon'in nei huhdoh in.
5 O Pakai, nang bou ka kinepna nahi.
O Pakai, nangma hi ka chapan laiya pat a, kahin tahsan nahi tai.
6 Henge, kapen apat nang'in neina umpi jingin;
kanu naobu sung'a ka kijil apat a neina chintup pat ahitai.
Hijeh a nangma ka thangvah jing hi datmo ding ahipoi!
7 Ka hinkho hi mi tamtah din kihilna thei ahi,
ajeh chu nangma hi ka thahatna le ka kiselna nahi.
8 Hijeh a chu nangma ka thangvah chim theilou nahi;
nilhum kei-kei a hi na loupina ka phondoh jing ahi.
9 Chule tua, ka tehphat hin, nei paidoh hih in.
Ka tha'n ajolou teng nei nungsun hih in.
10 Ka melma te hi keima douna di'n akihoutoh tauve.
Amaho hin thadoh ding eigo tauvin ahi.
11 Ama hon, “Pathen'in anungsun tai.
Cheu hitin gaman uhite,
ajeh chu tua hi koiman apanpi louding ahi,” atiuve.
12 O Pathen, munchom a potdoh hih in.
Ka Pathen, nei hung panpi loijin.
13 Keima eihehse ho hi sunem inlang sumang jengin.
Keima eibolsenom ho hi sujum inlang jachat sah in.
14 Keima vang nei kithopi dinga kinem jing ding kahi;
Keiman nangma ka thangvah be jing ding nahi.
15 Keiman nangma chonphatna ho hi mijouse ka seipeh ding ahi.
Keima thusei them hi hih jong leng na mihuhhingna thahatna hi,
nilhumkei keiya ka phondoh jing ding ahi.
16 O Thanei chungnung Pakai, keiman na thilbol nasatah tahho jeh a ka thangvah ding nahi.
Thudih choija nangma bou nahi hi keiman mijouse ka seipeh ding ahi.
17 O Pathen, nang'in ka chapan laiya pat a neina hil ahitai,
ken jong na thilbol kidang ho hi midang ho ka seipeh jing ding ahi.
18 Tunvang keima ka tehtan kasam akang tai,
nei nungsun hih in, O Pathen.
Tu khangthah te lah a hin na thaneina hi samphongle inge,
kei nung'a hung ding miho lah a jong na thilbol datmo umtah ho jong phongdoh ing kate.
19 O Pathen, na chonphatna hi van sangpen ho lah jong aphapeh e.
Nangman chutobang thilbol kidangtah ho hi nabol e.
O Pathen, koitoh na kitekahpi thei ding ham?
20 Hahsatna nasa tah-tah nei thoh sah in,
ahinlah nang'in ka hinkho na kiledoh sah kit ding ahi'n
chule leiset thuh lah a kon'in jong nei kaidoh in ahi.
21 Nang'in lolhinna sangjo cheh a jong nei kiledoh sah ding
avel'a neihin lhamon ding ahi.
22 Hiteng chuleh keiman semjang sai toh thoa nangma ka thangvah ding ahi,
ajeh chu O Pathen, nangma na kitepna a na thon ngaipoi.
Keiman na vahchoina tumging toh thoa kasah ding ahi,
O Israel adia Atheng.
23 Keiman nangma thangvahna la hi kipah tah a thong leuva kasah ding ahi,
ajeh chu nangin nei hung lhatdoh tan ahi.
24 Keiman nangma thilpha bol ho hi
sun nilhum a ka seiphongle ding ahi,
ajeh chu keima eibolsego chun
jachatna le jumna atoh tauvin ahi.