73
BU THUMNA (73 – 89)
Thenna Chun Malam'a Kipaman Ahin Lhut Ding Ahi.
Asaph labol.
1 Pakai chu Isreal te din aphai,
hitobanga lungthim theng ho dinga chun.
2 Keima din vang, ka lamjotna beikoncha bou ahitai.
Ka lamlhong anal in lhulham pai ding kahi tai.
3 Ajeh chu keiman mikiletsah ho gitlou bol pum hijongleu
akhantou u kamu teng ka otcha lheh jin ahi.
4 Amaho hi natna imacha neilou bangin ahing uvin;
atahsau adamtheiyun chule ahat theiyun ahi.
5 Amaho hin midang bangin boina imacha anei pouvin;
midang hon aneiyu lunggimna ama hon anei pouve.
6 Ama hon kiletsahna songmantam a kisem khivui bangin aki o uvin
chule gitlouna chu pon bangin akisil'un ahi.
7 Hiche mi bolthei ho hin alungsung uva
angaichat chan'u aneiyun ahi!
8 Ama hon mi jahda ding ngen aseijun;
kiletsah tah in midang ho chu suhmang ding ago uvin ahi.
9 Ama hon van dounan thu asei uvin,
a ocheng'un leiset pumpi asamse soh jeng'un ahi.
10 Hiti chun mipi ho'n athusei uhi ajah uleh akicha uvin,
akisulungdong gam tauvin ahi.
11 “Pathen'in ipi ahet am?” atiuvin,
“Hatchungnung in thilsoh ho hi ahe nadem?” atiuve.
12 Hiche migilou ho hi veuvin—
hinkho nom amangun ahao tul-tul jeng'un ahi.
13 Imacha phachomlou dinga lungthim theng kaput ham?
Themmona beihel'a hinkho kaman hi mohseh ham?
14 Nilhum keijin imacha phatchomna kamu pon hahsatna ngen ka mu jo'n ahi;
jingkah seh in lunggimna ngen in eilon vuh in ahi.
15 Keiman hitia hi midang jah a ka seikhah a ahileh,
na mite dia milhemlha kahi hinte.
16 Hijeh chun keiman miphalou ho hi i-atileh khangtou cheh-cheh uham ti hetchet dingin ka khol'in ahi.
Ahinla iti hahsat hitam!
17 Hichun O Pathen, nangma muntheng'a kalut in ahileh,
ajona in migilou te lhunna ding chu kahin hedoh tan ahi.
18 Tahbeh in nang'in amaho hi lhuhna thei mun jenga nakoi ahin
alhuh gamna diu akiling ditdet songpi chunga nakoi joh ahi.
19 Chomlou kah in amaho amah thah gam tauvin,
tijat nan alhoh mang gam tauve.
20 O Pakai, nangma nahung kipatdoh tengleh,
nang'in amaho ngolna chu na nuisat ding ahi
mikhat in jingkah lang'a amang anuisat tobang bou ahi.
21 Hijou chun ka lungsung ana lheh jengin,
hiti chun ka sunggil lang achiplha jengin ahi.
22 Keima vang mingol le thil hethemlou kana hi—
Nanga ding chun khohe phalou gamsa tobang bep kana hibouve.
23 Hijeng jongleh keima nang'a kahi jing'e;
nangman kajet lang natuh jing nai.
24 Na chih na'n eikaihoi jingin,
mun loupi tah chu nei lhut ding ahi.
25 Van'a nang tailou koi dang ba kanei ding ham?
Leiset chung'a thil dang jouse sang'in jong kalungin na ngaicha joi.
26 Ka tahsa bei henlang, ka lhagao lhadai jongleh,
Pathen chu ka lungthim'a kahatna ahi jing'in;
Ama hi tonsot a kei a ahi jing'e.
27 Ama dalha ho jouse chu mah thah ding ahiuve,
ajeh chu nangma dalha ho jouse chu nangman na sumang jin ahi.
28 Ahinla keima dingin, Pathen kom nai hi iti phat a hitam!
Keiman vang Hatchungnung Pakai chu ka kiselna ahi jing e,
chule keiman na thilbol kidang ho hi mijouse ka seipeh ding ahi.