74
Pathen Mite Douho Manthahna Dinga Taona.
Asaph labol.
1 O Pathen, idia hitih chanpi nei paidoh uhitam?
Ipi dinga na hamdong lah a kelngoi te douna a hichan gei hi na lunghan ham?
2 Khang masalai peh a na lhentum chate kahiu nei sumil hihbeh un,
hiche nam na goulu tum dia na ngeh jing chu kahiuve!
Chule hiche leiya na inn, Jerusalem jong sumil hihbeh in.
3 Hiche khopi kisumangsa ahin hung vahlen lang;
na melma te'n na Hou-In hi ichan geiya asuhset u hitam hinven.
4 Hiche mun a hi na melma te'n hanla anasap u hitam;
hiche mun a hi aponlap u ana khaisang'u ahi.
5 Ama hon gammang lah a
thing tan hon heicha ana lap u abange.
6 Heicha le chempong,
toh tho'n ana khenchip un ahi.
7 Ama hon na muntheng chu ahallha tauve.
Ama hon na munthenga namin chenna chu asuboh ui.
8 Chubanin jong, “Abon chan suseu hite!” akitikit uve.
Hijeh chun ama hon Pathen houna mun jouse jong ana hallhah u ahitai.
9 Keihon melchihna thil kidangtah ho chu ka mudoh jou tapouvin ahi.
Themgao ho jouse la aum gam tapouvin,
chule hiche hi itih leh kichai ding ti chu koimacha ahe aumpon ahi.
10 O Pathen, ka melma te'u hi itih chan gei na kijumso sah ding ham?
Namin theng hi tonsot a nasuh molphou sah ding hitam?
11 Ipi dia na banjet thahatna hi na chaloh sah lou ham?
Na khut thahat tah chu mangcha'n lang amaho khu sugam tan.
12 O Pathen, nangma, hi khanglui laiya pat a,
leiset chung'a huhhingna hin polut a ka lengpa nahi.
13 Nangman naban thahat in twikhanglen jong na lheh khen in
chule twikhanglen a cheng sahem ho luchang jong na vochip sohhel e.
14 Nangman Leviathan luchang jong na suchip in
atahsa neldi gam a um ganhing ho vahnan na mangtai.
15 Nangman leiset a kon'in twi tamtah na putdoh sah in,
chule a-itih a kang khalou vadung ho jong na sukang jin ahi.
16 Sun le jan jong nang'a ahin:
nangman vanlaijol'a avahho jouse le nisa jong na semin ahi.
17 Nangman leiset gamgi ho jouse jong na lheh khenin,
chule nipilai le phalbilai jong na gongtoh in ahi.
18 Ven Pakai, hiche melma ho hin ichan gei a nangma hi na jumso u hitam.
Ima hetkhenna neilou nam miten namin hi asuminse uvin ahi.
19 Hiche gamsa tobang miphalou ho hi vapal tobang mipha ho suhmang sah hih in.
Na mite gentheina hi itih chan'in jong sumil hihbeh in.
20 Na kitepna kinep umtah ho chu sumil hihbeh in,
ajeh chu gamsung hi muthim le pumhat a natohna adimset e!
21 Noise le chotpha a umte hi jumna tosah kit hihbeh in.
Amavang mivaicha le tahlelte namin choi-at sah in.
22 O Pathen, kipat in, chule na chungchang hi kiven’in.
Hiche mingol ten niseh a na jumsou hi geldoh in.
23 Na melma ten aseidoh uchu nungvet kit hih in
ahiloule amaho phunchel jing na chu.