21
David In Gibeon Mite Alethuh
1 Hiti chun leng David khanglai hin kum thum sungin kel analhan, hijeh chun David jong chun iti ding ham, tin Pakai chu adong tan ahi. Chuin Pakaijin hitin ahin seiye, “Saul chun Gibeon mite anatha jeh a Saul le a insung mite chunga thisanso jal a themmona aum jeh ahi,” ati.
2 Hijeh chun lengpan jong Gibeon mite chu akoukhom sohtai. Chule Gibeon mite hi Israel chate sung peng mi ahi pouvin Amor mite chia peng athimoh ho ahi bouvui. Chule amaho hi Israel chaten thalou dinga anasei vang uvin Saul chun ami Israel chate leh Judah te dinga atom ngaina jeh a amaho hi suhgam ding anati ahi.
3 David in hiche Gibeon mite kom'a chun hitin aseiye, “Ipi kabol peh diu ham? Itobang mongin longman nasem peh theiyu leng nang hon hiche Pakai goulo mite hi phatthei naboh thei dingu ham?” tin adong tai.
4 Hichun Gibeon miten leng David kom'a chun aseiyun, “Keiho le Saul chule a insung mite kah a thu hi dangka le sana peh a kihou chamna thei ding jong ahipoi, keihon Israel mite lah a mihem khat tou ka thalo diu thu jong ahi dehpoi,” atiuve.
Chuin David chun aseikit in, “Ahile ken nangho dinga ipipen ba kabolpeh diu ham? Nei seipeh un khuti leh ken nangho dia kabolpeh ding nahiuve” ati.
5 Hiti chun ama hon jong lengpa kom'a chun, “Israel gamsunga chenmun gemun kanei louhelna diuva keiho suhgamna dia lunggel tohgon ananei chu Saul ahi.
6 Hijeh chun Saul chate pasal sagi ho chu keiho khut a neihin peuvin lang, chule keihon jong amaho chu Gibeon khoa Pakai molsang chunga khun Pakai angsunga ga khailih jeng uvinge,” ati tauve.
Chuphat in David jong chun, “Chuti ahileh amaho mi sagi chu nape nauvinge,” atipeh tai.
7 Lengpan Saul chapa Jonathan chapa Mephibosheth vang chu ahing hoiye; ijeh-inem itileh amanin Pakaiya kihahselna ana nei lhon ahin, David le Saul chapa Jonathan in kihahselna ana neisa lhon ahitai.
8 Chuin lengpan Aiah chanu Saul jinu Rizpah chapa te ni Armoni le Mephibosheth amanin, Saul chanu Merab chapa te mi nga jong amanin, amaho hi Merab hin Meholath mipa Barzillai chapa Adriel kitipa chutoh ahin lhon ahi;
9 David in mi sagi hi Gibeon mite khut a apedoh tai; chuin ama hon jong hiche pasal sagi ho chu molsang chunga Pakai angsunga akhaiyuvin, mi sagi jen chu athigam tauve. Amaho atha niu chu sakol chang-at kipat til ni chu anahi.
10 Chuin Rizpah kitinu amin Aiah chanu hin khaodip pon akilah in, songpi chung khat a akisil khaodip pon chu aphan, chang-at kipat til apat chun van'a konna chuh go ahung juh kahsen apha-pha jenge; sun teng jongleh chunga leng vachate aponpha chunga chun atousah pon, chubang ma chun jan teng jongleh gamsa ho chu ponpha chunga chun alutsah dehpon ahi.
11 Chuin Saul thaikemnu Aiah chanu Rizpah thilbol umchan chu David kom'a aseipeh phat un,
12 David jong achen Saul leh achapa Jonathan gu-lheng lhon chengse beh chu Jabesh-gilead mipi ho koma'ah agalan ahi. (Philistine miten Gilboa molsang chunga Saul ajo chung uva, Philistine mihon Saul leh achapa Jonathan Beth-shan kholai dunga akhai nauva aga guh doh-u anahi.)
13 David chun hiche mun'a kon chun Saul leh achapa Jonathan gu-lheng lhon ho chu agapon, chuin mihon amani banga kikhailih jouse gubuh chengse chutoh akoikhom tauvin ahi.
14 Chuin lengpan gu-lheng lhon ho chu Benjamin gamsunga Zela khopia Saul pa Kish lhan khuh a avui diuvin thupeh aneitan ahi. Chule miho hin lengpa thupeh bang bangin abol sohkei uvin ahi. Hiche nunghin Pathen'in gamsunga kellhah chu akichai sah tan ahi.
Israel Te Leh Philistine Mihat Ho Kidouna
15 Hichun Philistine mite chun Israel chate dounan gal ahinbol uvin ahileh, David lengpa jong chu asepai te toh kilhon'in gal akonsuh kit in Philistine mite dounan gal agasat tauve. Hichun David jong chu atha achol lheh jengin ahi.
16 Chuti chun gal mun'a chun Rapha gal-hatpa chilhah a mi khat amin Ishbi-benob kiti pa hi apangin, ama chu atengcha jeng jong agih dan sum-eng jeng pounds sagi alhingin, chule ama hin chemjam thahlih khat akonga akikon, David chu tha jeng dingin ahin gotan ahi.
17 Ahin Zeruiah chapa Abishai chun David ahung panpin, Philistine te gal-hatpa chu adel khumin athat tan ahi. Chuphat in David chu asepai ten ajada uvin, “Nangma tukal keiho toh gal ikon khom louhel diu ahitai! Achuti loule namoh thilo ding ahin, Israel chate lah a meivah iti kimut mit ding ham?” atiuve.
18 Hiche jou nunghin Gob mun'a Philistine te toh gal kisatna aum kittai; hichea hin Hushah mi Sibbecai kitipa chun Philistine gal-hat miho chilhah te lah a mi khat Saph kitipa chu athat kit e.
19 Gob mun ma-ma a chun Philistine te ma-ma chutoh gal kisatna ana umkit in ahi. Hichea jong hin Bethlehem khoa mi Elhanan kiti Jair chapa chun Gath mi Goliath sopipa athat kit in ahi, Goliath tenglung chu thingtum tejen aphan ahi.
20 Chujouvin Gath khoa gal ahung sohkit tai; chule galmun'a chun mi adung sangtah khat ana um'in, amapa chu akhutphang langkhat cheh a chun akhutjung gup-gup akeh in chule akengphang lang khat gel a jong chun akengjung gup-gup cheh akeh in, abonchan akhut jung le akengjung agoma somni le li alhingin, chule ama jong hi gal-hat mihangte chilhah khatma anahin ahi.
21 Ahin aman Israel mite thu ngai louva, aseiset phat chun David sopipa Shimea chapa Jonathan in athat tan ahi.
22 Philistine mi hicheng li hi Gath khoa gal hang mihatte son leh chilhah ahiuve, ahin abonchauvin David le asepai te khut a ana thisohkei tauvin ahi.