22
David Thangvah La
1 Hiti chun Pakaijin amelma te jousea kon leh Saul khut a konna ana huhhing jal in David in hiche la hi Pakai henga anasan ahi.
2 Hitin lacheng asem e:
“Pakai chu keima dingin Ka songpi, ka kulpi, chule eihuhhingpa ahi,
3 Ka Pathen chu kasongpi, Kakiselna nahi;
Kapho le eihuhhinga kasakhia pang,
ka kulpi pal le kakiselna nahin,
eihuhhingpa nahi,
pumhat a kinona lah a jong nei huhdohji e.
4 Vahchoi dinga lomtah Pakai henga kataojin,
chule ka melma te a kon'in huhhingna kachang tai.
5 “Ajeh chu thina luipin eilon khum tan;
Manthah na lam jousen eilon khum tai.
6 Noimigam khaoguijin eihen tan;
kamasanga thina ding thang akikam’e.
7 Ahin ka genthei pet in Pakai henga ka taovin;
ka Pathen kom'a chun eipanpi din kataovin ahi.
Pathen Hou-In a aman kataona asang jin;
hichea chun anabenga kataona alutji e.”
8 “Hichun liing akihot tan leiset akinuh jin ahi.
Van todap khompi jouse jong akiling soh hel jenge;
Pathen alung han jeh chun lingpi ahin hot jengin ahi.
9 Chule Anah hom sung tenia kon'in meikhu ahung kitung doh in;
chule akamsung a kon'in mi bahgam thei mei akonge.
Meial deujeju Pathen a kon'in ahung kitung doh jenge.
10 Aman van mun jouse ahongin ahung kumlhai;
Akengto noiya muthim lhangkhal akiheh jenge.
11 Pathen Cherub chunga atouvin alenge,
huipia akijap a alen akimui.
12 Aman akimvela muthim lhangkhal akihehsah jin,
chule aloupina meilhang thuh tah twipin akikhange.
13 A angsung vahchan thethu lah a kon'in,
meikong am lenglung ahung lengdohji e.
14 Pakaijin van'a kon'in van akithinsah jin;
Hatchungnungpen chun o-thongin thu aseiye.
15 Aman athalpi ahinkap dohjin adoudal te athe chehji e;
kol aphen akithe jal lah-lah jeng'e.
16 Pakaijin ahinpho jia,
Anah homsunga ahu alha teng,
twikhanglen togei geiyin akimu theiyin,
vannoi bulpi khom jouse jong akimu theije.
17 Van chungsang langa kon'in aman eihin huhdoh jin jin,
twipi kinong a kon'in eiladohji e.
18 Chule kamelma hattah pa a kon'in eihuhdoh jin,
eihotbol miho hi kei din ahatval jiuve.
19 Ka hamsetni jongleh amaho hin eihin del khum jeng jiuvin,
ahin Pakaijin keima eikithopi jing nai.
20 Aman bitna mun a eipuilut jin;
aman eihuhdohji ajehchu eikipapi e.
21 Lamdih a kachon jing jeh in Pakaijin kipaman eipen;
chule kakhut te nin thil dih jeng abol jing jeh in kipaman eipei.
22 Ajeh chu keiman Pakai lamlhahna jouse kajui jingin;
agilou bol’in ka Pathen chu kada lha khapoi.
23 Ijeh-inem itileh ama chonna dan jouse chu kajuijin;
ama chonna dan jousea keima kavah mang khapoi.
24 Ama angsunga keima nolnabeiyin kaum jingin,
chonsetna a konin kakiveng jing jenge.
25 Hijeh chun keima dihna jeh hin Pakaijin kipaman eipei.
Aman mimol kahina amui.
26 “Mikitah ho hengah nang jong na kitahna namusah in,
chule nolnabei mi hengah nang jong nolnabei nahina namusah jin ahi.
27 Mi lungthengho hengah nalung thenna namusah in,
chule milungthim thenglou ho hengah nangma alung thenglou bangin naumji.
28 Chuti chun nangman mi kineosah te chu nahuhdoh jin,
mi kiletsah te vang chu suhnem din na velhi jinge.
29 O Pakai nangma hi keiya din ka thaomei nahin,
Pakai nangin kei dia muthim jouse na salvah e.
30 Nangma panpina jalla keiman sepai hon khat jong ka suhmang ding,
chule ka Pathen vanga palvum jong ka chop khup ding ahi.
31 Hiti chun Pathen hi alamlhahna jouse achamkim sohkeiyin,
Pakaijin mi athutep jong aguilhungji e.
Chule Ama kom'a kiselte dingin Ama hi ompho ahi jing'e.
32 Ijeh-inem itileh Pathen kiti chu koi dang ham?
Ahin iPathen'u songpi chu koipen ham?
33 Hiche Pathen hi keima kiselna dettah ahin,
chule ka lamlhahna jouse chamkim'in eisempeh tai.
34 Hichun Pathen'in ka kengphang teni jong sajuhpi keng abahsah in,
gam kenlah dung jenga jong det tah in eidinsah theiye.
35 Chule kakhut teni jong galsatje eihil them in,
sum-eng thalpi lapna din Aman ka banjang ahahsah e.
36 Nangman na mihuhhingna ompho neipen,
na kithopina chun eisuloupi jin ahi.
37 Kanoiya ka pansatna ding mun lentah nei hoipeh in
hijeh chun ka kengto teni ka lhonal tapoi.
38 Ka melmate nung kadel jin ka thatgam ji;
aboncha kasuh gamhel masangin kakinga jipoi.
39 Hiti chun abonchauvin kasat chap hel jin;
koima athoudoh aum tapon;
ka kengto noiya akijam chap tauvin ahi.
40 Ajeh chu nangin galsat din tha neipen,
eihin delkhumpa chu kanoiya nalupsah tai.
41 Hiti chun kamasanga ka melmate najam sah-sah jin,
eihot bolte chu keiman kathat gam jitai.
42 Panpi ngaiya apen-pen vang uvin ahuhhing diu koima aumpoi.
Pakai henga atao vang uvin aman adonbut dehpoi.
43 Keiman kholai dunga leivui bangin kachilngem ngemin;
chule kholai dunga bonlhoh bangin kachot phan ka chilgoi ji e.
44 “Gal eibol khum mitea kon'in gaojona neipen ahi.
namtin vaipi chunga alenpenin neisemin;
kahet khah louhel miten jong keima kin abol tauve.
45 Gamdang mite jong kineosah tah in kaheng'a ahungun,
ka thusei ajah jah ule kathun anung jiuve.
46 Gamdang mite chu alungu aneo jin
akisel nau kulsunga kon kithing pumin ahung potdoh jiuve.
47 “Pakai hingjing pa! Nunnom hen kasongpi chu!
Ka Pathen, eihuhhinga songpi chu, choi-at in um jing hen!
48 Phu eilah sah a Pathen chun;
mijouse chu keima noiya asonkun soh hel'in
49 kamelma te lah jenga jong eihuhdoh ji ahi.
Nangin kakidoupi kamelma te chunga neichoi sang ji in;
pumhat jenga mi nokhum mite lah a kon'in jong nei huhdoh jing jin ahi.
50 Hiche jeh hin, Vo Pakai, namtin la ah na vahchoi inge;
chule namin vahchoila sange.
51 Nangman Lenga natun keima hi galjona loupi tah neipen;
thao nanusa kei hi long louvin nei ngailui,
David le achilhah te dia atonsot atonsot geiya dingin,” ati.