23
David Kamcheng Soh Achaina
1 Hiche ho hi ahi, leng David in achaina lama ana seidoh thucheng ho chu:
David, Jesse chapa in thusoh ding asei—
David, choisanga umpan thusoh ding asei chu,
David, Jacob Pathen thao nusa,
David, Israel chate lah a lathem penpa chu.
2 “Pakai Lhagaovin keiya kon'in thu aseijin,
ama thu ho ka kamsunga aum'in ahi.
3 Chule Israel Pathen'in thu aseije.
Israel Songpi chun kakom'a thu ahin seitai:
Thudih a vaihompa chun Pathen ging pum'in vai ahom'in,
4 ama chu jing ninou bangin ahung soh jin,
twimei kailou ni jingkah a jing ninou ahungso abange,
chule leiset chunga hamhing le loudong
phatthei sah gotwi hung julha tobang ahi.
5 “Pathen'in alhen chu ka insung hilou ham?
Ahi, aman atonsot geiya dingin kitepna eisempeh e.
Thil ijakai hi abih bih chan aumsah sohkeiye.
Aman bitna le lolhinna eimusah tei ding ahi.
6 Ahin Pathen hephalou te chu ling kisat tan a kipai ding tobang ahiuvin,
ijeh-inem itileh amaho hi khut a kichom khom kit thei louhel ding ahiuve.
7 Amaho phuhlhuhna dia chu thih le tengcha kipat ding ahin;
abonchauva hi meiya kigouvam hel ding ahiuve,” ati.
David Dia Gal-hang Miho
8 David lengpa sepai te lah a dinga gal-hat mite chu amin'u hicheng hi ahiuve: Akhatna chu Joshobeam kitipa chu Hacmon mi ahin, ama hi David dia gal-hangpen mi thum lah a alamkai ahi; chule ama hin khatvei kisattona a mi 800 jen atengchan athat in ahi.
9 Chule ama ban a mihat mithum holah a khat kitpa chu ahile Ahoah chilhah, Dodai chapa Eleazar ahi. Ama hi Philistine te galbol dia ahung kikhop uva Israel chate jouse ajam uchun ama leh David bou ana kithon ahi.
10 Eleazar hi akipanin abantha acholdeh kahsen Philistine te asat chap-chap jengin akhut jeng jong chu achemjam chutoh thisanin atomchah jengin ahi; hiche nikho jong chun Pakaijin Israel chate minthang tah in gal ajosah tai; chule Eleazar nunga chun sepai te thilong chom khom mai maiyin ahung kitol uve.
11 Chule Eleazar ban a mihat athum channa pa chu Shammah ahin, ama hi Harar mi Agee chapa ahiye. Ama hi Lehi khoa chun Philistine te galbol din ahung kikhom uvin ahileh, akikhop nau tollhang dunga chun louthul adimset in akeh e. Ahin hiche mun achun Israel chate chu Philistine te ginnan ajam tauve,
12 ahivangin Shammah hi dettah in apangin, louthul lei laiya chun apang jingin, Philistine te chu athat that jengin ahileh Pakaijin jong loupi tah in Shammah chu gal ajosah tai.
13 Chang-at phat laiya hin Adullam songko sunga David aum laijin, Rephaim phaicham'a chun Philistine sepai hon khat in ngah mun anasem uve. Gal-hang somthum lah a mithum ho chu akumsuh uvin David aga kimupi uve.
14 Hiche pet hin David chu kulpi sunga anapange; chujongleh Philistine mite sepaiho chu Bethlehem khopia ana pansa uvin ahi.
15 Dangchah geovin David chun aseijin, “Ohe, mihem khatcha beh in Bethlehem khopi kulpi kelkot phunga twikul'a konin twi eihin doppeh henlang don din eihung petave leh,” ati.
16 Hichun hiche mihat mithumho hin Philistine te ngahmun kimlai tah chu atum keh jeng uvin Bethlehem khopi kulpi kelkot phunga twikula twi chu agathal uvin, David henga ahin dop peh tauve. Ahin David chun donjo talouvin atwi chu Pakai lhai nan tol'a asung lhan;
17 Chule hitin aseitai, “Vo Pakai, keiman hiche twi hi don hihhel inge. Iti ahinkho phal ngam hel a hiche twi thal a che ho thisan tobang hiche hi keiman kadon ding ham?” ati. Hiche jeh chun David in twi chu adon tapoi. Thil hijatpi hi hiche mihat mihangsan mithum ho chun anabol’u ahi.
David Gal-hang Mi Somthum
18 Chujouvin Joab sopipa, Zeruiah chapa Abishai chu mihat somthum lah a lamkaiya ana pang ahi. Chule ama hin mihem jathum jen chu atengcha akipat in akisat pin abonchau chun athat gamhel in, mithum ho tilouvin ama jong chu aminthang penin apangtai.
19 Abishai chu mihat somthum lah a aminthang pentah a pang ahi. Hijeh chun ama hi mihat thum ho lah a ajaolou vang'in amaho gal lamkaiyin apange; .
20 Kabzeel khoa mi Jehoiada chapa Benaiah kitipa jong chu gal-hang tah mi ahin, chule thil nasa tah-tah boldoh jeng thei ahi. Ama hin Moab mi sakei tobang ni athat in, chujouvin nikhat hi buhbang lhah nin achesuh in kokhuh sung khat a sakei bahkai khat agathat kit e.
21 Benaiah hin Egypt mi pasal thahat tah le mel-hoi tah khat jong athat e. Egypt mipa chun akhut a tengcha khat akichoi ahin, Benaiah chun tenggol khat akichoiyin ajonsuh jengin, hichun Egypt mipa khut a kon'in atengcha chu alahpeh in ama tengcha ma-ma chun hiche Egypt mipa chu athat tai.
22 Jehoiada chapa Benaiah chun thil hijat hi anabol in, mihat mi thum lah a chun aman jong minthanna aneitan ahi.
23 Chule ama jong hi mihat somthum lah a aminthang lheh tan, ahivangin mihat thumho lah a chun ajao naipoi. Ahivangin David chun amapa hi ama tahsa vengtup sepai lah a lamkai din apansah tai.
24 Mihat mi somthum lah a jao ho chu:
Joab sopipa Asahel;
Elhanan ahin, ama hi Bethlehem khoa Dodo chapa ahin;
25 Harod khoa mi Shammah ahin;
Harod kho mi ma-ma Elika ahin;
26 Pelon khoa mi Helez ahin;
Tekoa khoa mi Ikkesh chapa Ira ahin;
27 Anathoth khoa mi Abiezer ahin;
Hushah khoa mi Sibbecai ahin;
28 Ahoah khoa mi Zalmon ahin;
Netophah khoa mi Maharai ahin;
29 Netophah khoa mi Heled chapa Baanah ahin;
Benjamin mite Gibeah khoa mi Ribai chapa Ithai ahin;
30 Pirathon khoa mi Benaiah ahin;
Nahale-gaash luidung lama konna hung Hurai ahin;
31 Arabah khoa konna Abi-albon ahin;
Bahurim khoa mi Azmaveth ahin;
32 Shaalbon khoa mi Eliahba ahin;
Jashen chapa;
Jonathan
33 Harar khoa mi Shagee ahin;
Harar khoa akon mi mama Sharar chapa Ahiam ahin;
34 Maacah khoa mi Ahasbai chapa Eliphelet ahin;
Giloh khoa mi Ahithophel chapa Eliam ahin;
35 Carmel khoa mi Hezro ahin;
Arba khoa mi Paarai ahin;
36 Zobah khoa mi Nathan chapa Igal ahin;
Gad mi Bani ahin;
37 Ammon mi Zelek ahin;
Beeroth khoa mi Naharai ahin;
Zeruiah chapa Joab galvonpoa pang pa ahin;
38 Jattir khoa mi Ira ahin;
Jattir kho mi ma-ma Gareb ahin;
39 Hit mi Uriah ahi.
abonchauvin somthum le sagi alhing uvin ahi.