24
David In Mi Asimtoh
1 Israel chate chunga Pakai ahung lunghang kittan, hijeh chun aman David chu atildoh in amaho suhgimna din mijat simna tohgon aneisah tan ahi. “Nangma chen lang Israel chate le Judah mite gasim toh tan,” tin Pakaijin aseipeh tai.
2 Hijeh chun lengpan Joab le apanpi sepai lamkai ho kom'a aseijin, ‘Sahlam Dan apet lhanglam Beersheba chan geiya cheng Israel phung jouse gakhol toh sohkeiyun lang mihem ijat mong-mong hitam ti ka hetdoh theina dingin mihem jat gasim tauvin,” ati.
3 Ahivangin Joab chun lengpa kom'a chun aseijin, “Pakai na Pathen'in mipi ho chu aja ajan punsah jeng tahta, kapu lengpan namit a namu jeng nah chu me! Ipi dinga kapu lengpan hitobang pihi bol ding nagot hitam?” ati.
4 Ahinlah lengpan amaho chu mi aga simtoh diuvin aseitan ahi, hijeh chun Joab le sepai lamkaite chu Israel mipite simtoh dingin lengpa angsunga kon'in avaikon doh tauve.
5 Chuin ama hon amasapen in Jordan vadung chu apal galkaiyun lhanglam khopi phaicham, Aroer khopi Gad lam jotna ah chun aponbuh asongun, chujouvin Jazer langa achepai tauvin,
6 chujouvin Tahtim-hodshi gamsunga Gilead le Dan-jaan le Sidon vellah acheuvin ahi.
7 Chuin Tyre gammang lah ahinjot uvin Hiv mite khopi jouse le Canaan mite khopi jousea ahung uvin ahi. Achainan, Beersheba khopi Judah gamsunga Negeb a chun anga uve.
8 Hitia hi gamsung pumpi ahin khol sohkei phat uvin, lhako le ni somni alhin donin Jerusalem khopi ahung kile kit tauvin ahi.
9 Chuin Joab chun mihem jat asim nau mijat chu lengpa henga apelut tai. Hichea kisimdoh Israel mijat chu pasal galsat a chemjam choi thei cheh 800,000 alhingin, chule Judah mi chu 500,000 alhing uvin ahi.
David Chonset Jeh A Thutanna
10 Hiti chun mipi asim soh phat uvin, David chu athil hetkhenna in asugim behseh jengin ahi. Hijeh chun David injong Pakai henga taona aneijin hitin aseitai, “Ka thilbol chung changa hin keima melsa tah in ka chonse tai. Hijongleh tuhin Pakai, nahenga kahung tao ahi, nasohpa keima themmona jouse hi lamang tan; ajeh chu keiman ngol hoitah hin thil kana boltai,” ati.
11 Chuin ajing jingkah matah in David chu ajingtho a ahileh David dinga amitva neiya pangpa Gad themgaopa henga chun Pakaijin hitin thu ahin seiye.
12 “Chen lang David kom'a hitin gaseitan tin Pakaijin aseiye, “Keiman na chunga katoh ding thil thum kapeh ding, hiche thil thumho lah a chu nangman na ngap chat pen-pen khat chu kilhen in hichu na chunga kahin lhun sah ding ahi,” ati.
13 Hijeh chun Gad jong David kom'a ahungin hitin aseitai, “Na gamsunga kumthum sunga kellhah ding, lhathum sunga na galte masanga najam le-le diu, ahilouleh nithum sunga gamna hise nasatah lan ding nanop em? Tun eihin solpa henga ka seipeh ding chu hoiche pen ham geltoh in,” ati.
14 “Kalung agim behseh jeng tai! Ami khotona lentah ahinai, hijeh chun Pakai khut a kilehlut jeng taute. Mihem khut a vang neilhah lutsah hih hel’in,” tin David in Gad chu adonbut in ahi.
15 Hijeh chun Pakaijin Israel chate chunga chuche jingkah apat gamna hise ahin lansah pan tan, chule hichu nithum sungin alangin ahi. Hichea hin sahlam Dan khoa pat lhanglam Beersheba chan geiyin Israel mipi lah a mihem 70,000 athiuvin ahi.
16 Hichun vantil chun Jerusalem jong suhgam dinga agot a akhut alap phat chun Pakaijin thilse abol ding chu alung akhel’in vantil mi sugama pangpa kom'a chun hitin aseitai, “Aphaset tai! Tun nakhut umthim sah tan!” ati. Hiche pet a hi Pakai Vantil chu Jebus mipa Araunah changvohna mun changphol kom'a ana ding ahitai.
17 Chuin David jong chun mi sugam a pang vantil chu amudoh phat in Pakai kom'a hitin aseiye, “Vetan, achonse a leh adihlou bol a chu keima kahi! Ahinla hiche miho hi kelngoi banga ima helou ahi bouve ipi abolset anei mongu ham? Na lunghanna chu keima chung le ka inkote chunga lhungjo tahen,” tin aseitai.
David In Maicham Asem
18 Hiche nikho hin Gad chu David henga ahungin akom'a hitin aseiye, “Chetouvin lang, Jebus mipa Araunah changphol kom'a khun Pakai dingin maicham khat gasem tan,” ati.
19 Hichun Pakaijin Gad thu apeh bangin David jong chu ache touvin agabol tan ahi.
20 Chuin Araunah chu akiheijin agahven ahileh lengpa le asohte ama kom lam jona ahungu chu amun ahi. Chuphat in Araunah jong chu apotdoh pai paiyin lengpa chu aga jabol’in tol'a amai asulut tan ahi.
21 Chujongleh Araunah chun hitin aseiye, “Ipi ding pen tah a kapu lengpa nangma nasoh kei kom'a nahung jeng hitam?” atileh;
David chun adonbut in “Mipi chunga gamna hise hi akitol mang theina dinga nangma changphol hi chohdoh a hikom'a hi Pakai henga maicham khat semdoh ding kati ahi,” ati.
22 Hichun Araunah jong chun hitin aseiye, “Kilah jengin kapu lengpa, chule nangin pha nasah lampi a chun mang jengin; chule bongchal teni jong pumgo thiltoa naman dingin hikom'a hin aum lhone; chujongleh chang huina kangkui ho leh bongchal teni namkol jong hikom'a hin aumnai; hiche ho hi meithinga nati ding ahi.
23 Vo lengpa, Keima Araunah kitipa hin lengpa dinga thil ijakai katodoh jeng ding ahi,” ati. Chujongleh Araunah chun lengpa kom'a hitin jong aseiye, “Pakai na Pathen'in na taona chu na sanpeh tei-tei hen,” ati.
24 Ahivangin lengpan Araunah kom'a chun hitin aseiye, “Ahipoi, keiman na changphol man chu kapeh a kachoh ding ahi bouve; aman kapeh louhel thil chu keiman Pakai ka Pathen henga pumgo thiltoa kato louding ahi,” ati. Hiti hin David chun changphol leh bongchal teni chu dangka somnga in akichoh tai.
25 Hichun lengpa David chun Pakai anga maicham khat asemin, pumgo thilto le chamna kilhaina thilto atoh tan ahi. Hichun Pakaijin jong gamsung dinga ataona chu asanpeh in Israel chate chunga kon'in gamna hise lang chu akitol mangsah tan ahi.